中國嘅千帆寬頻網絡（Qianfan broadband network），又叫千帆星座或G60 Starlink，正面對前所未有嘅部署危機。原定要喺2025年底前將648顆衛星送上低地球軌道（LEO），但截至目前為止，實際上只放上去90顆，進度嚴重滯後，成個計劃面臨「軌道夢碎」嘅風險。

千帆星座由上海元信衛星技術公司主導，獲上海市政府力撐，計劃喺2030年前發射超過15,000顆衛星，目標係建立一個覆蓋全球、可直連手機嘅衛星寬頻網絡，全力對撼美國SpaceX嘅Starlink。不過，眼前最棘手嘅問題就係火箭唔夠用，而衛星發射資源又要同另一國家級項目「國網衛星」搶，進一步拖慢部署節奏。

根據國際電信聯盟（ITU）規定，獲批軌道與頻譜之後，衛星營運商必須喺限期內發射一定數量，否則會喪失資源分配資格。呢個「用唔用得晒就收番」嘅制度，令中國喺與Starlink嘅競爭中多添一層壓力。

為達到2025年目標，元信每個月起碼要升空30顆衛星，之後兩年更要將數量翻倍到1,296顆，先至有機會實現全球連接。問題係，中國目前嘅火箭供應遠遠追唔上。雖然長徵六號甲、八號、八號甲等火箭持續升級，但大多只能一批帶走18顆衛星，發射密度同頻率完全唔係SpaceX可以相比。人哋獵鷹9號每次運24顆，仲要一星期兩飛，重複使用技術更大大節省成本。

一位唔願透露姓名嘅北京火箭工程師話：「喺中國現階段嘅火箭產能底下，要俾千帆霸住全年一半以上嘅發射資源，幾乎係mission impossible。」佢仲預測，呢個短缺情況最少會持續十年，除非中國喺可重複使用火箭技術方面實現突破。

更令人擔心嘅係，2024年8月至2025年3月，千帆只完成五次發射任務，仲因為火箭招標乏人問津而錯過兩次機會。今年2月，計劃透過9次任務發射162顆衛星，但由於每次招標都得唔夠三間公司應標，自動取消咗兩次。根源在於，符合條件嘅長徵火箭太少，而商用火箭未夠成熟，飛行記錄未穩，市場信心仍待建立。

問題仲未講完，千帆仲要同另一個國家級巨型星座「國網計劃」搶資源。國網預計部署13,000顆衛星，已經列為國家重點項目，自然獲得優先。千帆如果再唔提速，隨時比國網搶晒發射窗口，被逼邊緣化。

就算成功上到天，挑戰仍未完。根據美國空軍追蹤數據，千帆已部署嘅90顆衛星中，有17顆仲停喺800公里低軌，未能上升到目標高度1,070公里。原因可能係電推系統失效、軌道調整延誤等技術問題。類似Starlink，千帆都係先放衛星喺較低軌道，再靠自身推進升軌，目的係慳火箭燃料。不過而家睇嚟，推進力未必頂得住咁大規模嘅調度壓力。

雖然目前千帆已成為全球第三大LEO寬頻星座，僅次於Starlink同英國OneWeb（後者約有600顆衛星），但結構性短板已經開始浮現。中國近年固然喺太空工程上有唔少亮眼表現，例如天舟九號成功補給天宮太空站，但要玩衛星巨型星座，講求嘅係高頻發射、穩定產能同靈活技術。

工程師建議，中國應該加快開發類似獵鷹9號咁可重複使用嘅火箭，或者喺國際上尋求合作，搵到一條彎道超車嘅出路。否則，千帆就算再有野心，都可能因為「上唔到天」而功敗垂成。

雖然面臨重重挑戰，千帆星座仍然係中國數字戰略嘅重要一環。不單止可以打通偏遠地區網絡連接，仲有助喺未來搶佔低軌衛星通訊主導權。不過，若部署持續延誤，不但可能失去ITU指定嘅軌道頻譜，仲會拖累整體航太技術聲望。

元信衛星對外仍未正式回應部署延誤嘅具體細節，但業界預期中央可能會介入，調整資源分配方式，或者直接出手保住進度。無論如何，千帆未來能否「乘風破浪」，將會成為檢視中國航太實力嘅關鍵指標之一。