歐盟近日通過針對俄羅斯嘅第18輪制裁方案，希望透過進一步施壓迫使俄烏戰爭早日結束，制裁包含中國金融機構同企業，引起中方強烈不滿。中國商務部周一（21日）高調反擊，警告歐盟必須立即停止有關「錯誤做法」，否則中方將堅決採取必要措施，保護本國企業利益。

今次歐盟制裁方案特別惹火，因為首次直接禁制中國金融機構，包括中國綏芬河農村商業銀行同黑河農村商業銀行，指責佢哋涉嫌幫俄羅斯「走精面」、規避國際制裁。另外，亦新增26間支援俄軍嘅企業入黑名單，其中7間係中國企業，包括3間香港公司。此舉惹嚟中國商務部嚴厲批評，直指歐盟完全唔理中方多次交涉，毫無理據就攞啲「莫須有」罪名，對中國金融機構及企業實施單邊制裁，嚴重損害雙方經貿關係。

中國商務部強調，中方一向堅決反對任何無聯合國授權嘅單邊制裁，認為歐盟呢啲動作嚴重違反中歐領導人嘅共識，為雙方嘅金融合作帶嚟極大負面影響。中方已經敦促歐盟必須立即收手，停止制裁中國企業嘅「錯誤行動」，並表明中國絕對唔會坐視不理，會採取相應措施力挺內企。

與此同時，中國外交部21日公布，歐洲理事會主席哥斯達（António Costa）同歐盟委員會主席馮德萊恩（Ursula von der Leyen）即將喺24日訪問中國，會同國家主席習近平會面。國務院總理李強會聯同哥斯達及馮德萊恩，一齊主持第25次中國—歐盟領導人會晤。今年適逢中歐建交50周年，本次會議議題將特別敏感，包括中國產能過剩問題，以及歐盟質疑中國喺俄烏戰爭當中對俄羅斯嘅支持態度。

歐盟外交暨安全政策高級代表卡拉斯（Kaja Kallas）日前批准新制裁時表態，呢一輪制裁係到目前為止對俄羅斯最嚴厲嘅制裁方案之一，歐盟會繼續加大力度施壓，務求逼到莫斯科只剩結束戰爭呢個選項。

中國外長王毅7月初訪歐期間曾經與馮德萊恩會面，當時王毅就再三表明，中國絕對支持歐洲一體化，並願意與歐盟攜手堅守多邊主義同自由貿易，推動和平解決國際爭端，一齊應對氣候變化等全球性議題。不過，隨著歐盟而家將矛頭直接指向中國企業，雙方嘅關係未來點走，將成為外界關注嘅焦點。