烏克蘭總統澤連斯基近日發表講話，表示期望未來半年內，國產武器喺前線使用比例由目前約40%提升至50%。同時佢仲透露，正同美國總統特朗普洽談一項重大無人機合作交易。美方有意採購經戰場驗證嘅烏克蘭無人機技術，作為交換，將向基輔提供先進美製武器，呢項潛在協議被視為美烏軍事合作一大突破，有望對美國軍事科技產生深遠影響。

戰事踏入第四年，烏克蘭面對資金緊絀、戰線綿長嘅雙重壓力，唯本土軍工產業卻逆勢冒起。為加強戰時體制效率，澤連斯基宣布改組內閣，提名具經濟背景嘅斯維里登科（Yulia Svyrydenko）出任新總理。佢過往成功促成同美國簽訂關鍵礦產協議，經濟管理能力備受肯定。至於原任總理什米加爾（Denys Shmyhal）就被提名接掌國防部，接替即將卸任嘅烏梅羅夫（Rustem Umerov）。有關人事安排仲需等待議會拍板。

澤連斯基指出，經同什米加爾及烏梅羅夫商討後，決定由國防部主導更多軍備生產權限。他強調，目前戰場上約四成武器係「烏製」，創下獨立以來新高，而50%國產目標雖具挑戰性，但佢對新政府有信心。

無人機已成烏軍抗俄關鍵利器。澤連斯基話，無人機唔只攻擊用途，更需強化攔截能力，以應對俄軍密集嘅無人機同導彈攻勢。基輔軍方已投資620萬美元，研發針對性嘅無人機防禦系統。同時，烏克蘭亦加強同西方盟友合作，喺無人機同空防系統等領域推動聯合生產。

澤連斯基接受《紐約郵報》專訪時透露，同特朗普討論中嘅「巨大交易」，除咗令烏克蘭獲得美國尖端武器外，仲會促進雙方航空技術互補。佢表示，烏軍嘅無人機已證實能夠突破俄羅斯防線，甚至精準打擊800英里外目標。佢舉例指，上月「蜘蛛網行動」（Operation Spider Web）中，117架無人機成功炸毀多個俄軍機場設施。

對美方嚟講，呢筆交易同樣具戰略價值。有美國軍事專家指出，美國喺小型軍用無人機技術上落後於中國同俄羅斯，呢個差距已引發國安憂慮。白宮已喺2026財年國防預算中大幅提高無人機項目撥款，強調要汲取烏戰經驗，以應對印太潛在威脅。

除咗美國，烏克蘭亦正同丹麥、挪威同德國等國洽談相類合作，期望透過技術分享，壯大軍工外交網絡。澤連斯基話，烏方願將三年戰爭中累積嘅作戰經驗，同歐美盟友分享，推動共同進步。

隨住烏克蘭軍工實力逐漸浮現，加上戰場經驗成為寶貴教材，全球軍事觀察家都密切注視呢場衝突所揭示嘅現代戰爭走向。今次美烏合作有望為雙方打開新一頁，不單鞏固烏方國防，更為美方引入實戰驗證技術，實現互利共贏。