甘肅省天水市麥積區褐石培心幼兒園近日爆出嚴重鉛中毒事件，全校251名學童中，有233人血液鉛含量異常，佔比高達93%，震驚全國。

官方調查指出，事件起因係廚房人員喺校長同意下，喺食物入面非法加入含鉛嘅不可食用彩繪顏料，導致紅棗發糕、玉米腸捲等食品鉛含量超標多達2000倍。截至7月11日，8人被刑拘，包括園長朱某、投資者李某，以及6名廚房員工，涉嫌「生產有毒有害食品」。

目前有201名中毒兒童已送院治療，當局緊急調派18名省級專家支援，涵蓋毒理學、急救、兒科等領域。雖然官方一再強調事件屬於單一食物污染，與環境無關，但民間聲音對此說法相當質疑，懷疑可能涉及更深層次嘅環境污染。

根據央視及國家衛健委報導，涉事顏料係通過網購平台購入，包裝明確標示「不可食用」。警方透露，幼兒園為吸引家長報名，用色彩鮮艷嘅食物宣傳照吸睛，結果釀成悲劇。國家疾控中心毒物專家孫承業表示，專家組喺7月4日已抵達天水，協助展開治療同心理疏導。

不過，社會質疑聲浪未減。網民追問：「真係為咗吸引招生，用嘅唔係幾蚊一包嘅食用色素，而係昂貴又刺鼻嘅工業顏料？」更加令人擔憂嘅係，早喺2006年，天水麥積區甘泉鎮吳家河村曾發生約200人鉛中毒事件，當時就曾懷疑與鄰近鉛鋅冶煉廠有關，最終卻不了了之。當年本地化驗數據與外地（蘭州）出現差異，令外界懷疑存在隱瞞或地方保護問題。

近日，X平台帳號「李老師不是你老師」爆料稱，7月9日有家長喺西安醫院拍片控訴，指有政府人員威脅佢哋唔好張揚，引發對事件透明度更大關注。此外，有家長揭露，同一名學生喺天水檢測出血鉛值為33，而西安卻驗到500，差距驚人，情況與2006年如出一轍。

更有醫學界人士指出，兒童出現脫髮、牙齒變黑、注意力不集中等症狀，可能並非單次中毒，而係慢性鉛中毒表現，暗示或存在長期暴露源頭。

甘肅省本身就係中國西北重工業基地，尤其白銀市係鉛鋅生產重地。雖然天水冇明確鉛礦或冶煉廠紀錄，但有研究顯示，西北地區工業活動可能令土壤、水源長期累積重金屬。外界因此呼籲，應擴大調查範圍，檢測當地空氣、泥土同農產品中嘅鉛含量，杜絕類似事件重演。

當局目前將事件定性為食品污染事故，強調屬於個人責任問題。但考慮到2006年嘅前科、檢測結果爭議，以及症狀顯示嘅長期暴露可能性，公眾對企業污染同地方保護主義嘅懷疑絕對合理。