美國中央情報局（CIA）公布一份解密報告，批評2017年美國情報機構就俄羅斯干預2016年總統大選所作出嘅評估程序。呢份報告由CIA局長拉特克利夫（John Ratcliffe）下令撰寫，質疑當年認定俄羅斯總統普京「渴望」協助特朗普勝選嘅結論。雖然報告冇否認俄羅斯有干預，但其對整個評估過程提出嘅批評，已引發新一輪政治爭議，被視為特朗普陣營重塑俄羅斯調查歷史嘅一部分。

呢份八頁報告由拉特克利夫喺2025年5月下令展開，屬於一項「經驗教訓」審查計劃。作為特朗普忠實支持者，拉特克利夫喺擔任國會議員及國家情報總監期間，一直公開反對，對俄羅斯干預嘅相關調查。佢聲稱希望透過檢討程序，提升情報分析嘅透明度同客觀性。

報告重點審視2017年由CIA、聯邦調查局（FBI）同國家安全局（NSA）聯合發布嘅情報評估。當年報告指出，普京親自下令透過虛假資訊同網絡攻擊手段干預選舉，目標係幫助特朗普打敗民主黨候選人希拉里。

不過，CIA最新報告就指出2017年評估存在多項程序問題。首先，整份評估草擬期不足一個禮拜，當中協調時間僅得兩日，無法充分探討其他可能情境。其次，分析內容過度依賴CIA一份高度機密嘅單一來源，缺乏多重來源支持，這與情報分析嘅標準做法不符。

報告亦批評，當年評估引用由前英國間諜克里斯托弗·斯蒂爾（Christopher Steele）撰寫、內容具爭議性嘅檔案。該檔案涉及特朗普與俄羅斯關係嘅未經證實指控，其中兩頁摘要被納入附錄，正文亦有提及，做法被批「暗中將未經證實嘅指控包裝成可信證據」，損害分析完整性。

報告進一步指出，「普京渴望協助特朗普」嘅結論原本評為「高度自信」，但應該調整為「中度自信」，以符合情報機構一貫評級標準。

值得注意嘅係，CIA最新報告並無否認俄羅斯確實曾干預2016年美國大選，並支持特朗普。呢一點與多份早前調查報告結論一致，包括由當時任職共和黨參議員盧比奧，領導嘅參議院情報委員會於2018年發表嘅報告，當中確認俄羅斯透過社交媒體操控輿論，以及發動黑客攻擊，試圖影響選舉結果。2019年特別檢察官穆勒（Robert Mueller）報告亦指出，俄方干預確實支持特朗普，雖然未發現足夠證據證明雙方存在犯罪陰謀，但指出特朗普競選團隊「歡迎」俄羅斯嘅協助。

分析認為，今次CIA報告集中針對程序問題，例如時間緊迫、過度依賴未經證實資料、以及信心級別評定，而唔係針對核心事實作出否定。正因如此，批評者指出報告更似係「技術性質疑」，反映拉特克利夫及特朗普陣營意圖藉程序缺陷，削弱整體調查可信度。

多名專家認為，CIA選擇公開呢類內部審查報告實屬罕見，亦進一步引發對政治動機嘅質疑。拉特克利夫早喺2020年就曾公開解密一份可能屬虛假嘅俄羅斯情報，今次亦聲稱將推動解密前總統甘迺迪遇刺案、新冠病毒起源等敏感議題。

雪城大學俄羅斯問題專家泰勒（Brian Taylor）指出，報告內容未有提供新證據，亦冇質疑核心事實，反而更像係政治立場宣示。他強調，真正出色嘅情報分析應該係向權力說真話，而唔係配合政治需要，「否則情報質素只會每況愈下」。