美國國會以218票贊成、214票反對嘅微弱優勢，成功推動「大而美法案」（A Great and Beautiful Act）過關，取得一場標誌性嘅政治勝利。

呢份全長900頁嘅稅收同支出法案，鞏固咗特朗普第二任期內推行嘅激進議程，尤其係反移民政策同減稅措施。法案延續咗2017年嘅減稅架構，並加入針對小費、加班費嘅扣除項目，對年收入少過75,000美元嘅長者，提供額外6,000美元扣除額。

白宮宣布，法案將喺7月4日美國獨立日，由特朗普喺白宮正式簽署成為法律，屆時將有B-2、F-22同F-35戰機飛越白宮上空慶祝，官方社交媒體更高調宣佈「勝利」，指法案彰顯特朗普領導力嘅成果。

法案通過過程充滿挑戰，但就顯示出特朗普仍然對共和黨內部嘅強大控制力。參議院方面，副總統萬斯投下決定性一票打破平手；眾議院則由議約翰遜（Mike Johnson）連夜遊說，最終只得兩名共和黨議員馬西（Thomas Massie）同菲茨帕特里克（Brian Fitzpatrick）投反對票，冇一位民主黨議員支持。

民主黨領袖傑弗里斯（Hakeem Jeffries）發表長達8小時44分鐘嘅馬拉松式演說，痛批法案係「大而醜嘅法案」，斥責內容偏袒富人、犧牲社會安全網。

儘管共和黨內部部分議員對法案導致嘅赤字惡化、福利削減抱有憂慮，但特朗普勢力依然壓倒一切，確保法案通過。

「大而美法案」投入350億美元加強國家安全與邊境執法，包括開發名為「金色穹頂」（Golden Dome Defense System）嘅先進防禦系統。但同時，法案削減1.2萬億美元喺醫療補助（Medicaid）同食品券（Food Stamps）方面嘅支出，並刪除奧巴馬醫改同拜登推動嘅《通脹削減法案》入面嘅氣候條款。

根據國會預算局（CBO）估算，法案將喺十年內增加3.3萬億美元國債，並導致約1,180萬人失去健康保險，當中以低收入家庭、長者同殘疾人士影響最大。

稅收方面，低收入戶最多只獲150美元減稅，中產可得約1,750美元，而最富有嘅家庭則享有高達10,950美元減稅，引起民主黨強烈反彈，認為措施將加劇貧富懸殊。

法案喺能源政策上爭議尤烈。首先係取消咗對新電動車（7,500美元）及二手車（4,000美元）嘅稅務抵免，並計劃喺9月30日起生效；其次係削減對風能、太陽能等可再生能源項目嘅稅收優惠。

與此同時，法案保留甚至擴大咗對化石燃料嘅補貼，當中碳捕集稅務抵免（45Q）增至每噸二氧化碳85美元（用於增強石油採收）及180美元（直接空氣捕集），獲得美國石油學會等業界強力支持。

然而，環保團體批評法案嚴重倒退，認為取消電動車補貼將直接影響民眾購買意願，削弱交通部門減排進度——該部門目前佔美國總溫室氣體排放量嘅28%。

「大而美法案」成功通過，不單係特朗普第二任期嘅關鍵勝利，更係美國政治極化現象嘅一面鏡子。支持者認為法案有助刺激經濟、強化國防，符合共和黨基本盤利益；反對者則憂慮，赤字惡化、貧富懸殊擴大，以及社會安全網嘅削弱將帶來深遠影響。