美國總統特朗普預計喺7月7日喺白宮接見以色列總理內塔尼亞胡，議程包括加薩停火、人質釋放同伊朗核問題等敏感議題。會面安排正值美國積極推動以哈停火協議之際，特朗普重申停火係首要任務，突顯佢喺中東和平進程中自居主導角色。

特朗普上星期對傳媒表示，加薩有望喺下星期達成停火，但冇交代具體依據。白宮新聞秘書萊維特強調，終結衝突係特朗普優先考慮，希望拯救更多性命。然而，談判陷入膠着，主因係停火協議內是否包含結束戰爭爭議未解。大約有50名人質仍遭哈馬斯扣押，估計存活人數唔到一半。特朗普同內塔尼亞胡都共同表示願意終止戰爭，並考慮擴大《亞伯拉罕協定》，促進區域穩定。內塔尼亞胡，表示會攜手推動和平。不過直到現在，以色列安全內閣會議都未有係加薩未來方向達成共識，反映內部分歧仍然嚴重。

另一方面，加薩地區持續惡化，平民死傷事件頻繁，令特朗普同內塔尼亞胡口頭上嘅和平承諾聽起上嚟格外虛偽。6月30日，以軍喺加薩南部向正排隊領取糧援嘅民眾開火，釀成最少23人死亡。汗尤尼斯嘅納賽爾醫院收治大量中彈遺體。現場目擊者描述場面混亂，軍人開槍警告後即朝人群掃射。加薩市Al-Baqa Cafe當日亦遭空襲，造成最少30人死亡，包括婦孺。該處係戰爭以嚟少數仍營業嘅場所，居民常去充電上網，未料變成廢墟。殉難者包括當地專業記者哈塔布（Ismael Abu Khatab），其母親喺醫院門外痛哭場面令人心碎。

以軍表示正調查事件，堅稱打擊目標係哈馬斯武裝分子，民眾死傷歸咎於對方藏身民區。不過，有報導指，以軍高層下令可對無武裝人群開火，內塔尼亞胡被迫公開譴責，軍事檢察部門已啟動戰爭罪調查。呢啲指控同特朗普同內塔尼亞胡口中嘅「人道關懷」形成強烈反差，尤其係對糧食援助點嘅襲擊，更令人質疑佢哋對人道主義嘅真正承諾。聯合國同人權團體要求獨立調查，國際社會對加薩死亡數字不斷攀升表示震驚。自2023年10月哈馬斯突襲引爆戰爭以嚟，已有超過5.6萬名巴人死亡，當中一半以上係婦孺，和平承諾喺屍橫遍野之下顯得蒼白無力。

喺外交之外，美國對以色列嘅支持亦包括軍售。國務院最近通過一筆5.1億美元嘅軍售案，向以色列提供逾7,000套聯合直接攻擊彈藥（JDAM）導引套件，稱係為強化以色列自衛能力，並符合美國利益。呢批JDAM喺針對哈馬斯及伊朗行動中發揮咗關鍵角色。同時，特朗普喺社群媒體譴責內塔尼亞胡貪腐審訊係「政治獵巫」，誓言要「拯救」對方，引起以國內部不安。此舉突顯佢對內塔尼亞胡嘅過度偏袒，亦損害咗佢喺中東調解人身份嘅公信力。

再睇伊朗，局勢根本未真正平息。6月30日，伊朗著名什葉派教士席拉吉（Grand Ayatollah Naser Makarem Shirazi）頒布宗教教令，指特朗普同內塔尼亞胡為「同真主為敵者」（mohareb），按伊朗法律屬可判死刑罪名。此教令回應美以近日對伊朗核設施嘅襲擊，特別係6月13日同22日事件，導致935人死亡。另一教士帕納希安更聲稱刺殺兩人係宗教義務。西方多國，包括法國、德國同英國，紛紛譴責伊朗煽動恐怖主義。伊朗亦因國際原子能總署（IAEA）署長格羅西冇譴責襲擊，決定暫停同其合作，令核危機升溫。特朗普警告伊朗勿挑釁，否則將招致嚴重後果，內塔尼亞胡則暫未發聲。

核問題同樣會係今次會晤焦點。美國國防情報局報告顯示，美以聯手攻擊對伊朗福爾多、納坦茲等設施造成破壞，但未能完全摧毀濃縮能力。IAEA署長格羅西表示，部分設施仍可運作。面對民主黨質疑打擊成效，特朗普堅稱美以合作係維護全球安全之舉。不過，喺伊朗發出對特朗普本人嘅教令背景下，會談氣氛難免緊張。

內塔尼亞胡此行被視為加薩停火協議嘅關鍵時刻，特朗普可能借機推動《亞伯拉罕協定》擴大，試圖以和平為名打造地緣外交成果。但以國內部分政要反對停火，加上哈馬斯立場強硬，伊朗威脅升高，令談判前景充滿變數。6月21日特拉維夫出現要求釋放人質嘅大規模示威，加薩人道災難繼續惡化，糧食短缺壓力逼近。喺此種種矛盾之下，特朗普同內塔尼亞胡嘅和平承諾難免被視為空話。