中國嘅失業問題引起社會廣泛關注。國家統計局最新數據顯示，2025年5月全國城鎮調查失業率為5.0%，較上月下降0.1個百分點，青年失業率（16至24歲，排除在校生）降至14.9%，為2024年6月以來最低，表面上呈現「穩中向好」態勢。然而，民間嘅真實經歷與官方數據形成強烈反差，揭示出當前失業潮嘅嚴重性遠超想像，經濟放緩、債務壓力同政策執行挑戰交織，構成一場潛在社會危機。

國家統計局強調，2025年前五個月城鎮失業率平均為5.2%，大學畢業生就業有所改善，6月數據預計喺7月中旬發布，市場預測為5.1%。不過，有巿民對數據真實性提出質疑，並指出，官方統計失業人口需同時符合城鎮戶口、曾被公司開除領失業金、領取期限兩年內等條件，令好多自願離職者、長期失業者及農村戶口勞動者被排除在外，導致數據大幅低估實際失業規模。另一位來自上海嘅巿民批評當地政策，表示所有離職都被申報為自願，無法領取失業金，除非經過高門檻嘅勞動仲裁先可以恢復失業身份，顯示現時保障措施嘅嚴重不足。

多名巿民分享嘅個人經歷進一步勾勒出就業市場嘅困境。一位名校碩士畢業、從事投資行業13年嘅巿民表示，自己去年失業後投出上千封簡歷無果，半年內換咗三份唔穩定工作，身邊北大碩士等高學歷朋友一樣難覓出路，有人轉行賣冇底薪冇社保嘅保險，有人開滴滴勉強維生。佢仲提到一位滴滴司機，創業失敗後唯有瞓喺車內，靠充電站洗面刷牙，聽落令人心酸。建築行業同樣面臨寒冬，中鐵建某公司因公路項目停滯，年底將有近千人待崗，整個行業裁員規模恐怕涉及十幾萬人，目前僅水利同民用建築項目勉強支撐。

呢輪失業潮根源與經濟放緩密不可分。房地產市場低迷重創建築業，加上特朗普政府嘅高關稅政策打擊中國出口行業，外部壓力進一步加劇就業困境。相比1990年代嘅下崗潮，當年工人冇房貸壓力，而且經濟快速增長提供咗再就業機會；但今日唔同，房貸、消費貸等負擔沉重，失業者難以翻身，斷供後房產被法拍，信用破產。教育、醫療、養老等「隱形負債」亦削弱咗家庭抗風險能力。有巿民慨嘆，當年下崗工人仲可以蹬三輪、打散工養家，依家連條褲腰帶都係分期付款買嘅，靠乜嘢堅持落去？

專家警告呢場危機唔止係經濟層面。上海財經大學校長劉元春2023年曾表示，高校生失業潮或會持續十年，每年有1,200萬畢業生湧入市場，勞動力價格崩潰，結婚率、生育率勢必下滑，甚至可能引發政治不穩。人口老齡化、債務通縮同養老金崩盤等潛在風險，可能喺未來20年演變成重大人道挑戰。雖然官方政策聚焦穩就業，但靈活就業保障不足，失業保險覆蓋率偏低，加上技能錯配與區域差異，結構性失業問題愈趨嚴峻。若經濟刺激不足，2025年全年增長可能僅得3至4.5%，低於近5%嘅目標，就業壓力只會進一步上升。

中國現時嘅失業潮，遠遠唔止官方公布嘅5.0%所能反映。巿民嘅無力感同專家嘅警告都反映出，政府應正視數據與現實之間嘅撕裂，加強財政支持、完善社保體系、推動新興產業發展，從根源上舒緩愈演愈烈嘅就業危機。否則，呢場失業潮嘅影響可能唔止係經濟層面，仲有可能動搖社會穩定。