俄羅斯總統普京近日喺聖彼得堡國際經濟論壇上發表具爭議性言論，聲稱「凡俄軍踏足之地皆屬俄羅斯」，並重申俄烏係「同一民族」，公然挑戰烏克蘭主權。此番言論隨即引發烏克蘭總統澤連斯基強烈回應，佢喺日前晚間發表影片講話，直斥普京野心昭然若揭，並宣布將推動新一輪針對俄羅斯嘅國際制裁，呼籲美國總統特朗普及其他盟友提供堅定支援。

澤連斯基指出，普京並非自戰爭爆發後先萌生侵略之念，早於2014年克里米亞事件前，普京嘅思想已深受帝國主義影響。他警告，普京對烏克蘭的野心唔止止步於此，更可能對其他前蘇聯國家構成威脅，「呢唔係一場邊境衝突，而係一場延續至今、企圖顛覆國際秩序嘅帝國復辟計劃」。

喺軍事應對方面，澤連斯基表示將擴大全國無人機計劃，包括遠程打擊型無人機及前線偵察與防禦設備，「我哋會為每一個俄羅斯佔領者嘅足跡準備一架烏克蘭無人機」。據資料顯示，截至2025年，烏克蘭無人機造成俄軍裝備損毀比例已達六至七成，成為戰場上重要戰力。

澤連斯基嘅無人機計劃絶對唔係「講笑」，月初烏克蘭安全局展開「蜘蛛網行動」，派出117架無人機，飛越4,300公里打擊俄境內五個空軍基地，並成功擊落A-50預警機，顯示烏軍喺遠程精準攻擊領域已取得突破。當日亦傳出40億美元國防資金撥款，加快無人機攔截器生產，以應對俄軍每日高達500架無人機嘅攻勢。

然而，俄羅斯亦積極應戰，計劃於年內生產超過3萬架無人機，未來更定下年產200萬架戰術型無人機目標，雙方喺無人機技術層面進入軍備競賽。

除咗軍事層面，澤連斯基亦加強外交攻勢，推動盟友加碼制裁俄羅斯。歐盟已於5月20日及6月10日相繼實施第17輪與第18輪制裁，集中針對能源及金融領域，例如下調俄羅斯石油出口上限至每桶45美元，並限制多間銀行參與國際交易。英國亦喺6月17日更新制裁名單，針對俄軍工體系關鍵供應鏈實體與個人。

然而，美國立場逐漸軟化。總統特朗普自重返白宮後，明顯收緊對烏軍援，轉為強調調解角色。佢拒絕參與新一輪制裁，更於6月17日下令解散專責壓制俄羅斯嘅白宮內部小組。早前提出「兩星期內結束戰爭」構想亦未見成果，並於6月7日建議「讓烏俄再打一陣」，態度備受質疑。

澤連斯基對此發出警告，指普京正透過與伊朗等國深化軍事合作，以進一步鞏固其政權同抗衡西方制衡。他呼籲特朗普重新審視形勢：「俄羅斯拒絕所有國際調解努力，包括美國、歐洲、中國、巴西及非洲提出嘅和平方案，唯一目標係維持戰爭，延續侵略。」

喺戰場前線，烏克蘭正面臨更頻密攻勢。僅喺6月1日至17日期間，俄軍已對烏境發射超過3,300架長程無人機，集中攻擊東部及北部地區，造成重大人員傷亡及基礎設施破壞。

雖然局勢緊張，但雙方於6月20日完成第六輪戰俘交換，象徵最低程度嘅溝通機制仍然存在。然而，未來局勢走向仍高度不確定，取決於國際社會是否能再次凝聚一致立場，以及美國是否會重返對抗俄羅斯侵略嘅主軸位置。

澤連斯基重申：「烏克蘭唔會放棄任何一寸土地。喺呢場保衛戰中，我哋需要真實支持，而唔係冷漠觀望。」