斯德哥爾摩國際和平研究所（SIPRI）最近發布嘅《2025年年鑑》指出，全球核戰風險喺新一輪軍備競賽推動下顯著上升。九個擁有核武嘅國家——美國、俄羅斯、英國、法國、中國、印度、巴基斯坦、北韓同以色列——都密集推進核武現代化工程，唔單止升級現有武器，仲加快研發新一代核裝備。與此同時，人工智能（AI）同太空技術迅速發展，正重新定義核能力，為全球安全形勢添上更多不確定性同風險。

報告估計，截至今年1月，全球核彈頭總數約為12,241枚，其中9,614枚屬於軍事庫存，3,912枚已經部署喺導彈或者飛機上，當中約2,100枚處於高度戒備狀態。俄羅斯同美國兩國擁有全球約九成核武，分別持有5,580枚同5,044枚彈頭。至於中國，其核武庫增長速度最快，估計已有最少600枚，預計到2035年可能升至1,500枚。印度、巴基斯坦、以色列同北韓亦唔甘後人，積極擴展同升級自身核能力——北韓聲稱2024年7月已經進入戰術核武器開發嘅最後階段，而以色列就喺同年進行導彈推進系統測試，並升級咗內蓋夫沙漠嘅鈈反應堆。

自冷戰結束以來，全球核彈頭數量由1980年代中期高峰嘅64,000枚，大幅減至今日嘅一萬二千多枚。不過，SIPRI所長史密斯警告，呢個長期減少趨勢已經逆轉，新部署核武嘅速度開始超過退役彈頭拆除嘅步伐。他指出，全球安全環境自2007年開始惡化，2014年之後情勢進一步緊張，而2022年俄羅斯入侵烏克蘭更成為關鍵轉捩點。俄羅斯喺2023年單方面暫停參與《新削減戰略武器條約》（New START），而該條約將於2026年屆滿，目前無任何續約跡象，幾乎等同於雙邊核軍控架構面臨瓦解。

同一時間，美國喺拜登政府領導下將核武庫現代化列為優先政策，投入大量資金發展新一代導彈同投送系統。各國嘅現代化工程，已經由簡單翻新轉向深層變革，顯示核裁軍時代可能已經告終。

區域局勢方面亦進一步推高風險。俄羅斯宣稱已喺白俄羅斯部署核武，而部分北約歐洲成員國則表態願意部署美國核武，令核共享機制進一步擴張，導致核擴散風險上升。中國迅速擴張核武庫，印度同巴基斯坦發展新型導彈系統，都顯示全球正逐步走向新一輪核軍備競賽。地緣政治持續不穩，令整體國際安全形勢變得更複雜、更難以預測。

而最令人憂慮嘅，係人工智能、網絡戰同太空軍事化所帶來嘅新風險。史密斯指出，今次競賽比冷戰時代更加難以掌控，因為科技進步令核武管理同決策變得更加複雜。AI雖然理論上可以加快處理情報、提升決策效率，但若系統依賴大型語言模型或者機器學習，就可能因演算法故障或者資料偏差，導致誤判甚至錯誤啟動核打擊。

佢特別提及1983年蘇聯中校彼得羅夫嘅經典案例——當時預警系統錯誤地顯示美國導彈來襲，彼得羅夫選擇唔上報，從而避免一場可能嘅全面核戰。史密斯質疑，如果未來真係交由AI作決定，邊個可以代替彼得羅夫咁冷靜同理性？

此外，太空技術嘅軍事應用亦帶來新挑戰。核武國家日益依賴衛星進行導航、監視同通信，但衛星系統極易成為網絡攻擊或反衛星武器嘅目標，一旦受損，有機會干擾核指揮通訊系統，進一步增加誤判同誤擊風險。

新冷戰格局下，核武與AI嘅結合為全球安全局勢添上陰影。無論係技術、制度定倫理層面，人類社會可能都尚未準備好應對一個「智慧化核武」時代所帶來嘅挑戰。