亞馬遜（Amazon）喺周一宣布，會斥資200億美元喺賓夕法尼亞州興建兩個大型數據中心綜合設施，當中一個選址就喺蘇斯奎哈納核電廠旁邊，計劃直接向該核電廠取電。呢項被州長夏皮羅（Governor Josh Shapiro）形容為賓夕法尼亞州史上最大規模嘅私人投資，唔單止為當地創造短期就業機會，更突顯咗核能喺數據中心供電上嘅新角色。

據了解，亞馬遜計劃喺費城以北嘅費爾利斯山基石貿易中心興建一個數據中心，預計會用傳統電網供電。而另一個項目就落戶喺蘇斯奎哈納核電廠旁，採用被稱為「表後直連」（behind the meter）嘅供電模式，就係用戶自己向發電來源直接攞電，唔透過傳統電力公司的電網系統，直接由核電廠獲得960兆瓦電力，約佔該廠四成輸出，足夠供應超過50萬戶家庭嘅用電需求。

呢項獨特嘅「表後直連」安排，目前正接受美國聯邦能源監管委員會（FERC）審查。不過，呢個模式或會引發電力分配不均同埋大型用戶免繳電網升級費用等爭議，可能對公平競爭造成挑戰。

亞馬遜雲計算部門全球數據中心副總裁米勒(Kevin Miller)表示，呢個項目有助鞏固公司喺人工智能同雲計算需求激增下嘅基礎設施能力，亦反映企業對穩定、低碳能源嘅強烈需求。據悉，亞馬遜過去一年已喺密西西比、印第安納、俄亥俄等州投資超過100億美元興建數據中心，突顯其對核能同清潔能源嘅長遠興趣。

州長夏皮羅喺伯威克舉行嘅記者會上表示，呢筆投資唔單止會帶嚟數以千計嘅建築職位，亦能為地方稅收注入龐大資金，有助對抗賓州長年嘅人才流失問題。他形容：「賓夕法尼亞州嘅人才長期被掏空，呢筆投資係重建社區嘅重要一步。」

不過，批評者提醒，數據中心長期創造嘅就業崗位有限，未必能夠徹底扭轉經濟困境。但支持者就強調，龐大嘅建築同營運投資，足以為地區經濟注入活力，長遠稅收亦不容忽視。

為咗吸引亞馬遜進駐，賓夕法尼亞洲政府提供咗數千萬美元嘅誘因，包括1000萬美元用於學校、社區學院同工會嘅培訓計劃。亞馬遜亦將受惠於賓州現行嘅數據中心設備免銷售稅政策。

有業界人士形容，科技巨企直接連接核電廠取電，反映數據中心對電力需求愈發龐大。微軟最近亦傳出同三里島核電廠合作，計劃重新啟動一座反應堆，為旗下數據中心提供20年穩定能源。

專家認為，亞馬遜呢個項目唔單止係地區經濟嘅「催化劑」，更係核能同科技深度融合嘅新示範。但點樣喺滿足大型科技公司用電需求嘅同時，兼顧電網公平同長遠規劃，仍需各方協調解決。

隨住人工智能同雲計算需求持續高漲，亞馬遜同其他科技巨企類似嘅投資將會越來越多。夏皮羅表明：「呢只係開始。賓州將繼續吸引更多投資，打造科技同能源嘅創新。」