智利政府同科技巨頭Google簽署咗一份歷史性協議，正式啟動「洪堡計畫」（Humboldt Project），預計喺2027年建成全球首條直連南美洲、亞洲同大洋洲嘅海底光纖電纜。呢條全長14,800公里嘅電纜，會由智利瓦爾帕萊索 (Valparaiso) 出發，經過法屬玻里尼西亞 ( Polynesia ) ，最後到達澳洲雪梨，為全球數字基礎設施開啟新篇章。電纜容量高達每秒144TB，設計使用壽命有25年，足以應付未來數十年嘅數據傳輸需求。呢個項目唔單止會大幅提升智利嘅互聯網速度同穩定性，仲會惠及阿根廷、巴拉圭同巴西等南美鄰國，促進區域數字經濟嘅蓬勃發展。

洪堡計畫自2016年首次提出，經歷多年可行性研究，喺2024年獲得Google加盟，由智利國營國家發展公司（Desarrollo País）牽頭嘅聯盟主導，並調整路線，將法屬玻里尼西亞納入作為中轉站。依家協議簽署，意味住項目正式進入實質施工階段，未來兩年會完成海底電纜鋪設同登陸站建設。項目總投資估計介乎3億至5.5億美元之間，由Google負責主要資金，但具體金額暫時未完全披露。智利政府出資2,500萬美元，突顯對項目嘅堅定支持。合作模式亦容許未來其他電信運營商接入電纜，進一步擴大商業潛力。

智利外交部長范克拉維倫指出，喺地緣政治局勢日益緊張嘅環境下，洪堡計畫由其重要。呢條電纜會加強智利同亞洲國家，特別係中國嘅數字聯繫，促進雙邊貿易同技術合作，同時鞏固智利作為南美數據樞紐嘅地位，吸引科技、礦業同金融業投資。

項目實施過程中，深海施工要克服複雜地形同洋流影響，確保電纜唔受地震等自然災害干擾，同時符合國際海洋生態標準，兼顧環境保護。洪堡計畫嘅成功，將會為智利以至南美洲嘅數字化轉型注入一支強心針，令瓦爾帕萊索成為南美數據門戶，進一步提升智利喺全球數字經濟中嘅影響力。對Google嚟講，呢次合作係繼Curie同Tannat電纜之後，其全球海底電纜網絡嘅又一重大布局，進一步擴大喺拉美地區嘅影響力。

隨住2027年竣工日期日益臨近，洪堡計畫無疑會成為全球數字基礎設施嘅標誌性項目。