英國政府最新公布嘅2025年國防開支審查，標誌住軍事策略嘅重大轉向，喺全球局勢日益緊張嘅背景下，特別係針對俄羅斯對北約嘅潛在威脅，展現出前所未有嘅決心。由前北約秘書長羅伯遜勳爵 ( George Robertson ) 帶頭嘅呢份審查，將英國軍事野心聚焦喺「歐大西洋」地區，強調戰備能力嘅提升，同時承諾將國防開支推高到2027年佔GDP 2.5%，2034年達3%，為軍事現代化同經濟增長注入強大動力。

同以往傾向喺亞洲海域扮演強勢角色嘅策略唔同，呢次審查將英國嘅軍事焦點收窄到歐大西洋，突顯北約優先嘅防禦政策。鑑於俄羅斯可能喺兩三年內對北約構成威脅，英國定位為北約嘅創新領頭羊，積極推廣無人機、數據戰同數碼技術嘅應用，將採購同創新週期從年計縮短到月計，務求喺戰場上快人一步。為咗實現呢些目標，政府計劃改革採購流程，確保資金穩定支持武器系統生產，告別零碎式採購嘅老方法。預計喺2030-31財政年度，國防開支需額外增加173億英鎊，雖然時間表令人擔心稍為拖長，但政府強調國防開支將成為經濟增長嘅火車頭，創造數以萬計嘅就業機會同學徒機會，特別係透過新嘅工業合作，帶動英國企業嘅發展。

喺軍事現代化方面，審查承諾喺2030年代末開始採購更多核動力但配備常規武器嘅攻擊型潛艇，取代現有嘅七艘「機敏級」潛艇，同時以新型「無畏級」（Dreadnought class）潛艇取代四艘裝備「三叉戟」飛彈嘅「先鋒級」（Vanguard class）潛艇。呢啲項目將會令蘇格蘭嘅克萊德（Clyde）海軍基地忙起嚟，預計會支持大約800個職位，仲會為當地經濟創造更多就業同學徒機會。與此同時，英國計劃增加遠程常規導彈嘅部署，提供一個遠低於核打擊門檻嘅威懾力，但目前有限嘅反導防禦能力，卻令人關注未來投資嘅迫切性。

俄烏戰爭嘅教訓為審查提供咗重要啟示，無人機喺現代戰爭中展現出驚人威力，促使英國重視戰術同技術創新。政府正推動無人機干擾同反干擾技術嘅發展，確保部隊能快速適應新戰法。為咗避免前線作戰能力不足，審查仲提出建立一套「隨時起動」嘅工業產能，確保彈藥、推進劑同炸藥嘅持續供應，喺戰時能頂得住壓力。

然而，核武器部署嘅議題喺蘇格蘭掀起激烈爭議。審查考慮喺伯克郡奧爾德馬斯頓（Aldermaston）增加彈頭製造能力，甚至可能將核導彈部署喺皇家空軍飛機上，呢啲舉動產生左英國對美國核防禦保護傘依賴嘅質疑。蘇格蘭民族黨（SNP）強烈反對核武，黨魁斯文尼 (John Swinney)重申立場，呼籲將資源投向常規武器。工黨內部亦出現分歧，特別係蘇格蘭黨員對核武升級嘅強烈反對，令政府喺決策上面臨挑戰。

除咗軍事層面，審查仲關注軍人嘅生活質素，承諾改善住房質量，幫手吸引同留住服役人員，應對勞動市場嘅緊張局面。政府採取全社會方式，鼓勵公眾參與國家韌性建設，更新同軍人嘅國家契約。不過，軍事威脅嘅加劇為財政帶來壓力，財相喺即將到來嘅支出審查中，需設法放寬舉債限制，平衡國防同其他公共開支嘅需要。