侵侵又出手    叫停國際學生簽    想讀書先查IG?
侵侵又出手 叫停國際學生簽 想讀書先查IG?

美國國務院宣布暫停受理新嘅國際學生簽證面談預約,並計劃擴大對申請人社交媒體帳號嘅審查,引發廣泛爭議。多家媒體引述國務院內部電報,指呢項由國務卿盧比奧下令嘅政策,旨在加強對學生及交流訪問學者簽證嘅篩選,特別針對參與校園抗議嘅國際學生。

呢個政策可能會延遲簽證程序,影響依靠國際學生學費嘅美國大學財政,同時引起言論自由同公平性嘅激烈討論。美國國際教育工作者協會(NAFSA)強烈譴責呢個政策,強調國際學生係美國教育體系嘅寶貴資產,並非威脅。

美國國務院前日透過內部電報,指示海外領事館暫停安排F、M、J類簽證嘅新面談預約。已預約嘅申請者仍可繼續,但新預約會被取消,直至有新嘅社交媒體審查指引出台為止。電報仲建議領事館調整資源分配,優先處理美國公民服務、移民簽證及防範詐騙工作,減少對學生簽證嘅投入。

呢項政策與特朗普政府對國際學生嘅嚴格監控息息相關。特朗普自第二次上任後,針對參與挺巴勒斯坦校園抗議嘅學生採取強硬措施,今年3月已經撤銷逾300名學生嘅簽證,截至5月,被撤銷簽證嘅人數更上升至數千人。哈佛大學因抗議活動而備受關注,示威者高舉「冇國際學生,哈佛就唔係哈佛」嘅標語,突顯國際學生對大學嘅重要性。

國務院嘅新措施將擴大對申請人Instagram、X同TikTok帳號嘅審查,以檢查是否有威脅國家安全嘅內容,尤其關注反恐及反猶相關嘅貼文。早喺2019年起,申請簽證人士就要提供社交媒體帳號資料,2023年起領事館更被要求強制執行審查,截圖記錄可能含有敏感內容嘅貼文,即使事後被刪除亦要記錄。新政策將審查擴至所有學生簽證申請者,引發對審查標準嘅質疑。一啲領事館人員抱怨審查標準模糊,例如喺X平台張貼巴勒斯坦旗幟是否需要額外審查,令執行變得更複雜。

呢項政策對國際學生及美國大學影響深遠,暫停新嘅面談預約可能導致簽證延誤,影響2025年夏季同秋季嘅入學計劃。來自中東等地區嘅學生可能面臨更大阻力,加劇地緣政治緊張情勢。國際學生支付嘅全額學費係美國大學財政嘅重要支柱,尤其係科學研究領域,外國研究人員更佔據重要角色。如果國際學生註冊人數下降,大學財政將會嚴重受損。

早前哈佛大學已經因為相關爭議而備受壓力,23日聯邦法官發出臨時限制令,阻止特朗普政府取消哈佛招收國際學生嘅權利。呢個政策可能削弱美國作為教育大國嘅吸引力,國際學生可能轉投英國、加拿大或澳洲。

發佈時間: 2025年05月29日 13:12
關於我們 | 加入我們 | 隱私權聲明 | 免責聲明 | 錯誤回報/意見提供
電郵: hongkongmatters.info@gmail.com

Copyright © 2022 香港元宇宙. All rights reserved.