中國汽車市場喺今年5月正式進入價格戰嘅白熱化階段。電動車龍頭比亞迪率先出招，對超過20款車型推出大幅降價同補貼，引發業界連鎖反應，車股連環下挫。吉利、蔚來、零跑等多間車企紛紛受壓，市場憂慮情緒升溫。長城汽車董事長魏建軍警告，中國汽車業已陷入「不健康狀態」，隱藏住類似房地產「恒大」爆雷嘅風險。

根據《路透社》報道，比亞迪喺5月26日宣布，新一輪優惠涵蓋超過20款車型，其中純電掀背車「海鷗」起售價降至5.58萬元人民幣，但要申請「舊換新」先用得着。消息一出，吉利即日跟進，蔚來、零跑等亦感到壓力。5月26日港股收市，比亞迪（1211-HK）股價下挫8.6%，吉利（0175-HK）更跌9.5%，蔚來（9866-HK）同零跑（9863-HK）亦錄得3%至8.5%不等跌幅。翌日跌勢未止，反映投資者對價格戰嘅焦慮持續升溫。《彭博社》更指出，比亞迪部份車型降價幅度高達34%，例如「海豹」雙馬達混能轎車，起價由15.58萬元直降至10.28萬元。

長城汽車魏建軍接受訪問時直言，行業出現結構性危機，一些車企太過專注炒市值、博股價，而忽略咗企業財務根基。他認為目前形勢與當年房地產泡沫類似，甚至警告風險已經「醞釀中」。魏建軍又指出，電動車企業普遍仍處於虧損狀態，長期咁打價格戰，唔單只令利潤被侵蝕，更壓緊咗整個供應鏈壓力。一啲企業為咗殺價，逼供應商減價、延遲付款，搞到上下游都喘唔過氣。

佢舉例講，有啲車款從22萬元暴跌至12萬元，「咁大嘅跌幅點可能仲保得住品質與安全？呢啲係絕對唔可能嘅事」，但冇點名任何品牌。為吸引消費者，車企仲開始免費送出智能駕駛系統等高端配置，令毛利進一步被壓縮。即使比亞迪、零跑喺2024年第二季錄得盈利，但利潤率明顯收窄，市場對佢哋能否長期維持盈利越來越質疑。

中國國家發展與改革委員會上星期亦罕有出手，發聲明警告部分企業進行「低於成本」嘅價格戰，擾亂公平競爭秩序，表明唔排除會出手糾正。呢番說話反映發改委已注意到車市亂局，或會出手維穩。

有分析師認為，比亞迪嘅激進減價短期內可能刺激銷售，但長遠嚟講，或加快行業淘汰賽。中國目前有169家車企，其中超過一半市佔率低於0.1%，場面猶如20世紀初美國車業混戰時期。比亞迪此舉可能會清走一批弱勢對手，但自己都要承受唔少壓力。