針對白牌車問題特區政府遲遲未有具體回應，「小車主捍衛權益關注組」發言人林智聰今日（21號）向傳媒表示，現正計劃發起眾籌，為未來嘅法律行動籌備經費。佢透露，具體嘅法律行動方式仍然商討緊，但初步有幾個方向，包括就政府無有效保障的士專營權提出司法覆核、因政府打擊白牌車不力而影響的士業界生計作出民事索償，或者直接向龍頭網約車平台Uber追討賠償。

林智聰表示，眾籌行動會分階段進行，首先會由的士車主每人籌款1000蚊，然後再由的士司機參與，最終可能開放俾所有「同樣睇唔過眼白牌車」嘅公眾人士捐款。林智尸聰透露，有車主建議考慮向政府追討損失，或參考澳洲當地的士業界向Uber索償嘅做法。關注組稍後將會再開會，詳細討論唔同方案嘅利弊，同時再向律師諮詢專業意見，估計訟費有可能超過一億元，所以首階段嘅目標係先籌得1000萬蚊作為起動資金。