解放軍南部戰區星期二（4月30日）派出海空兵力，喺南海海域進行例行巡航。戰區發言人表示，近期菲律賓頻繁喺海上從事侵權挑釁行為，不斷製造事端，仲拉攏域外國家搞所謂「聯合巡航」。解放軍南部戰區指，巡航期間，海空兵力全程實施監控同警戒，強調情況「盡在掌握」。

發言人話，戰區部隊會持續保持高度戒備，堅決捍衛國家領土主權同海洋權益，並堅決維護南海地區和平穩定。

呢次解放軍巡航正值菲律賓與美國於上星期一同展開為期三星期嘅年度聯合軍演「肩並肩」（Balikatan）。演習地點亦涉及南海，澳洲、日本、英國、法國等國家都有派軍事人員參與。

美軍表示，呢次演習係要測試美菲部隊喺應對唔同安全情況下嘅協作能力，包括應對南海等地區可能出現嘅挑戰。