越南政府計劃斥資約700億美元，興建一條全長1541公里、設計時速350公里嘅南北高速鐵路，連接首都河內市玉回站（Ngoc Hoi）同胡志明市守添站（Thu Thiem）。工程預計2026年12月正式動工，2035年完工，將兩地嘅旅行時間由現時約30小時大幅縮短至5小時，對促進國內交通效率、經濟增長同區域連通性有重大意義。

整個項目將分階段推進，越南政府已制定詳細路線圖，並預計喺2025年11月前選定承包商。政府強調盡量使用國內資金同技術，減低對外國貸款依賴，同時引入國際專業知識，以確保工程質量。目前，包括中國、日本、法國及南韓等，均被視為潛在合作夥伴。

南北高速鐵路將採用雙軌標準軌（1435毫米）、軸重22.5噸設計，沿線設有23個客運站及5個貨運站，覆蓋20個省市。主要以客運為主，兼顧輕型貨物同高價值電商物流，而現有鐵路將升級成重型貨運專線。

事實上，興建南北高速鐵路嘅構想由來已久。早喺2010年，時任總理阮晉勇已提出建設計劃，但因成本高昂（約佔當年GDP一半）及市民負擔能力問題，被迫擱置。隨住經濟快速增長及財政改善，越南政府於2024年11月30日由第15屆國會正式通過重啟計劃，視之為國家現代化同提升東南亞地區競爭力嘅重要一步。

預計到2050年，高速鐵路每年可運輸1820萬噸貨物，並創造超過20萬個就業機會。現時越南客運市場由公路（62.9%）及航空（34.2%）主導，鐵路僅佔2.9%；貨運方面，鐵路更只佔0.7%。高速鐵路建成後，將為乘客同貨主提供更快捷高效嘅替代方案，並刺激鋼鐵、建築材料同電氣建設等行業發展。

不過，項目同時面對多重挑戰。建設需徵用約10800公頃土地，安置約12萬名居民，社會阻力可想而知。政府承諾會採取環保措施，減低對生態系統影響，並強調高速鐵路作為低碳交通工具，有助實現碳中和目標。

資金安排亦備受關注。雖然官方預計總投資676億美元，但過去已有國會代表提出，高昂票價可能令一般市民難以負擔，加上龐大投資可能對國家財政造成長期壓力。此外，技術選擇及合作夥伴嘅問題亦相當敏感，因為涉及越南戰略自主權同未來運營能力。政府必須小心權衡，引進先進技術同時，亦要確保關鍵基礎設施唔會受外國過度影響。