面對美國關稅戰，中國當局近排加強咗反擊宣傳攻勢。中國外交部今日（29日）推出咗一條名為「不跪」嘅宣傳片，大聲疾呼，指向霸權低頭，只會令國家陷入更加深重嘅危機，強調中國「唔跪、唔退讓」。

北京近排大力升級對美中關稅戰嘅宣傳火力。由中共中央政治局喺25號開會，提出要「進行國際經貿鬥爭」，到中國外交部長王毅喺28號出席巴西里約熱內盧舉行嘅金磚國家外長會議時，誓言「妥協只會讓霸凌者得寸進尺」，再到今日外交部推出「不跪」呢條片，都清楚表達咗中國喺關稅戰上唔會讓步嘅堅定立場。

呢條由中國外交部製作嘅影片「不跪」，背景音樂磅礴激昂，一開場就拋出問題：「你聽說過颱風眼嗎？看似得到短暫的風平浪靜，實則是引（請）君入甕的致命陷阱，醞釀更加猛烈的腥風血雨。」片中形容，美國煽起全球關稅風暴，對其他國家玩「90日緩刑」嘅小把戲，刻意孤立打壓中國，「就像暗藏殺機的颱風眼」，隨時爆發更大風暴。

影片指出，向霸權低頭，「就如同飲鴆止渴」，最終只會令自己陷入更大災難。片中更引用歷史例子提及日本同法國，話「歷史已經證明，妥協退讓難求網開一面，卑躬屈膝終致步步緊逼」，想靠退讓換和平根本係癡人說夢。

之後，影片繼續強調：「中國不跪，因為我們深知以鬥爭求合作則合作存，以妥協求合作則合作亡。中國不退，弱國的聲音就有人傾聽，霸權的欺凌就有人阻擋，世界的公理就有人守護。」明言只有堅持抗爭，先可以保住國家嘅生存同尊嚴。

影片仲講到，「一切反對派都是紙老虎」，點名話「美國不代表全世界，美國貿易在世界占比不到1/5」。中國方面認為，當世界各國團結一致，美國就只係「小船孤篷」。影片重炮批評美國，話「帝國主義者都很傲慢。要是講一點理的話，那是被逼得不得已了」，暗示美國根本唔會守信用，隨時出爾反爾，仲話中國必須堅持自己嘅選擇同承擔。

去到片尾，影片引用咗富有詩意嘅語句：「任爾東西南北風，亂雲飛渡仍從容」，又講到「總要有人站出來高舉火炬，劈開迷霧，照亮前路。當每個國家都挺直脊梁，世界必將衝破霸權的高牆」，呼籲國際社會齊心對抗美國霸權壓迫。