《彭博社》報道，美國避險基金Citadel創辦人兼行政總裁Ken Griffin近日喺史丹福大學商學院一場活動中透露，指自己最近喺北京參加一個會議時，與一位中國高級官員交談，對方對美國制定以振興低薪製造業崗位為目標嘅貿易政策感到不解，質疑美國點解要放棄作為世界強國嘅角色，反而朝中國模式靠攏。

Griffin指出，特朗普政府嘅「做交易」心態與國家長遠利益背道而馳，從整體上睇，美國比中國從全球化中獲益更多，而貿易戰破壞咗美國與世界其他地區嘅關係。佢強調，美國應該發揮自身優勢，例如創造知識產權同內容，而唔係逆勢而行，試圖帶返啲將會被自動化取代嘅工廠職位。佢話：「與喺工廠入面製造拉鏈、家用電器或平板電視相比，呢啲偏重創造性嘅職位嘅薪酬水平高得驚人。」

Griffin亦指出，特朗普政府嘅關稅政策唔但無法帶返製造業職位，仲會損害美國自身嘅全球形象。佢話：「我哋正喺侵蝕美國作為可靠貿易夥伴嘅品牌形象，呢個品牌唔止係經濟層面，仲包括文化、金融實力同軍事實力。」

作為共和黨嘅大金主，Griffin曾經捐出超過1億美元支持共和黨候選人同相關事業。佢早前已經批評貿易戰變得荒誕不經，警告關稅政策正喺損害美國自身嘅全球形象。

與此同時，《華爾街日報》》就引述美國阿波羅全球管理公司首席經濟學家Torsten Slok嘅分析指，由於美中貿易快速減少，未來幾週內，美國消費者和企業可能會面臨類似新冠疫情時期嘅供應短缺，美國商店可能出現「貨架空缺」，而價格將會上漲。

根據Slok引用嘅中國港口集裝箱出港數據，美國通脹壓力已經開始浮現。因為中國一直都係美國最大商品供應國，無論日用品、電子產品、服裝甚至製藥業，大量貨品都係靠中國供應。一旦供應鏈出現問題，短期內根本搵唔到替代來源。

統計數字顯示，美國市場上80%玩具、成堆電子產品同服裝，都係來自中國。2022年，美國自中國進口總值高達4390億美元，而呢啲貨品大部分喺短時間內無法由其他國家取代。

Slok特別提到，玩具業將係第一個中招嘅行業，跟住落嚟會連帶消費電子、服裝同藥品等行業都受波及。而且供應鏈問題唔止影響消費者，仲會波及到就業市場。