中美關係持續緊張，中國近日傳出有意單方面解除部分對歐洲議會官員嘅制裁，引發外界對歐中關係會否解凍嘅可能。根據消息人士透露，中國同歐洲議會就解除2021年起實施嘅制裁進行緊談判，現時已經進入最後階段。

據報導，解除制裁對象包括歐洲議會人權委員會同五名曾遭中方制裁嘅議員。呢批制裁源自2021年3月，當時歐盟聯同英國、加拿大、美國對中國新疆生產建設兵團四名高層領導人實施制裁，理由係佢哋喺新疆打壓維吾爾族人權。北京迅速反制，針對多名歐洲議員、機構出手，包括禁止入境、凍結資產等。

遭制裁嘅前歐洲議員包瑞翰（Reinhard Bütikofer）喺接受德國之聲訪問時直言：「中國喺2021年出招制裁，簡直係戰略上嘅愚蠢舉動。最大嘅受害者其實係中國自己，因為咁樣反而激化咗歐洲對中國人權政策嘅反彈。」佢認為如果中方願意主動解除部分制裁，係遲來嘅清醒，但歐盟唔應該因此放棄本身對中國長期堅持嘅原則。

雖然歐洲議會表現積極，但歐盟執行機構——歐盟委員會及其對外行動署就相對保守。一名發言人表示，歐盟未見中國喺新疆人權狀況方面有明顯改善，因此與新疆相關制裁會繼續維持，認為「我哋嘅政策唔係基於禮尚往來，而係基於人權原則。」

與此同時，中國近月對歐洲頻頻釋出友好訊號。今年3月，習近平喺北京接見多名歐洲商界領袖，強調外資企業對中國現代化係非常重要，又呼籲歐洲企業加大投資中國，「投資中國就係投資未來」。之後西班牙首相桑切斯訪華期間，習近平又再提及，歐盟係「多元世界嘅支柱」，應加強合作，應對全球風險同挑戰。

雖然北京姿態放軟，但多名歐洲外交官都表示都唔應該樂觀得太早。有德國外交官對指出，歐方喺今年7月預計舉行嘅歐中峰會上，提出「明確要求」，包括要求中方停止支持俄羅斯對烏克蘭嘅戰爭、縮減對產能過剩行業嘅補貼等，呼籲唔好被「中方非出自真誠的和解」牽着走。

德國馬歇爾基金會中國問題研究員指出：「中國喺戰略立場上冇太大轉變，今次可能係對國際局勢逼出嚟嘅調整。歐洲要識分清楚策略讓步同根本改變之間嘅差異。」

即使中方落實解除制裁，歐洲議會是否會因此解凍《歐中投資協定》審批仍然未知。該協定喺2020年底談妥，但喺制裁事件爆發後即遭歐洲議會凍結。議長梅特索拉發言人表示，恢復議會與中國正常往來固然重要，但會唔會繼續推動協定通過，要視乎中方未來有冇實質讓步。