美國針對俄羅斯實施新一輪制裁，合共涉及約280個個人同實體，其中包括20間中國內地同香港嘅公司，係美國制裁俄羅斯以來，牽涉最多中企嘅一次。
美國財政部對將近200個目標執行制裁，國務院則瞄準80多個目標，美國財政部聲明話，近300個制裁目標當中，有啲係俄羅斯本土企業，仲有啲係中國、香港、土耳其、阿塞拜疆、阿拉伯聯合酋長國等國家同地區嘅實體。
美國政府表示，呢啲企業幫助俄羅斯攞到急需嘅技術同埋器材，包括製造無人機嘅零件、運送國防關鍵物品去俄羅斯等。美國財政部長耶倫喺聲明度話，美國政府一直警告，為俄羅斯提供物質支持嘅公司會面對嚴重嘅後果，但新一輪制裁名單入面嘅企業卻唔理會呢啲警告。
呢啲措施係為咗打擊規避制裁，同埋支持俄羅斯嘅軍工發展、生化武器計劃嘅行為。根據美國國務院聲明，今次制裁主要針對協助俄羅斯研發、供應軍民兩用航太製造同埋技術器材嘅中國實體，具體嚟講，呢啲行動係針對對俄羅斯國防工業至關重要嘅產品生產商同埋出口商。
今次係華府首度對棉纖維素、硝酸纖維素嘅製造商同供應商執行制裁，呢啲纖維係製造火藥、火箭推進劑同其他爆炸物嘅前驅體。有好多俄羅斯同中國嘅公司因為參與呢啲材料嘅貿易而受到制裁。同時，美國亦指責俄羅斯違反全球化學武器禁令，而且擴大限制俄羅斯將來運輸液化天然氣（LNG）嘅能力。
據了解，美國財政部嘅制裁名單中，香港凡達科技有限公司，被指向俄羅斯出口咗293批電子產品，包括可用喺無人機嘅零件；巨航航空科技（深圳）有限公司被指提供咗無人機螺旋槳、訊號干擾器、感測器同引擎畀俄羅斯；至於中成重裝防務集團則被指控向華格納集團供應物資等。
美國國務卿布林肯指出，中國對俄羅斯國防工業嘅支持好關鍵，唔單止係武器方面，而係產業基地需要嘅零件，同埋喺工具機、微電子領域，中國企業都係俄羅斯壓倒性嘅第1大供應商。
一名國務院嘅高級官員表示，為俄羅斯戰爭提供物資嘅中國實體，係美國國防部同政府高層關注嘅焦點，中國係俄羅斯國防工業基地關鍵零件嘅主要供應商，而俄羅斯正喺利用呢啲資源對烏克蘭發動戰爭，如果中國唔再支持呢啲商品出口，莫斯科將好難維持至今喺戰爭中嘅努力。
中國駐美國大使館發言人回應稱，中方堅決反對美方非法單邊制裁，中俄間正常嘅經貿往來符合世貿組織規則同市場原則，唔針對任何第三方，唔應該受到任何干涉同脅迫，中方會維護中國企業嘅合法權益。《I》
表列被美國納入SDN名單中國公司：
安陽鍛壓數控設備有限公司
重慶宗申航空發動機製造股份有限公司
廣州金升陽科技有限公司
香港凡達科技有限公司
圖龍國際控股有限公司
RG Solutions Limited
巨航航空科技（深圳）有限公司
武漢高芯科技有限公司
武漢同昇科技有限公司
香港恒邦微電子有限公司
芯時空電子有限公司
IPM Limited
成都市衛萊科技有限公司
金銘盛科技（香港）有限公司
中成重裝防務科技（山東）集團有限公司 / 中成重裝防務科技集團
SILVER TECHNOLOGY LIMITED
Pixel Devices Limited
衡水和碩纖維素有限公司
衡水元展貿易有限公司
中船聯海運有限公司
