聽日就係中國內地「五一」假期開始，國家疾病預防控制局最近發布通知，要求各個入境口岸要好好做足重點傳染病疫情防控工作，包括為入境者進行新冠病毒核酸抽檢。

國家疾病預防控制局喺4月26號發布咗「做好2024年『五一』假期及春夏季新冠病毒感染等重點傳染病疫情防控工作的通知」，指出而家國內傳染病疫情總體穩定，新冠病毒JN.1變異株引起嘅全球疫情已經過咗高峰，而且下降到較低水平，但新冠疫情仲係持續低水平波浪式流行，新冠病毒仍然持續變異，疫情依然有一定程度嘅反覆性。

呢份通知重點強調咗7項主要措施，包括：加強口岸疫情防控、監測預警同調查處置、傳染病醫療救治、預防撞種、重點機構疫情防控、同埋旅途同旅遊活動疫情防控。

加強口岸疫情防控方面，《通知》指出，要密切關注全球新冠、登革熱、麻疹、瘧疾等重點傳染病疫情，落實入境人員體溫監測、醫學巡查、流行病學調查、醫學排查等措施，「做好入境人員新冠病毒核酸抽檢」，加強出入境人員健康宣教。

通知表示，新冠病毒仍然在變異，境外疫情輸入風險增加，「五一」假期人員流動性上升同埋聚集性活動增加，有可能加大疫情傳播風險，防控工作任務艱巨複雜，要求「各地各部門要始終把新冠等重點傳染病防控工作擺在突出位置」。

通知亦提到，要加強旅途同旅遊活動疫情防控工作，要求客運場站根據客流變化及時增加或開放進出站同安檢通道，引導乘客有序進出站、候乘車（船、機）；旅遊景區及時動態疏導客流，避免室內場館大規模人員聚集；住宿、餐飲服務單位加強食品衛生和安全管理。

對於國內重點機構嘅疫情防控工作，《通知》要求各地加強養老、托幼、學校、社會福利等機構嘅疫情防控，加強食品和飲用水管理，嚴防聚集性疫情發生，切實保障學生健康和校園安全。指導養老機構、社會福利機構加強外來人員探視、老年人和兒童回家及返院管理，出現發熱、咳嗽、腹瀉等症狀人員要及時就醫排查，降低疫情引入和傳播風險。

呢個消息一出，即刻吸引咗一班習慣北上嘅港人嘅關注。廣東省官方人員就喺4月30號（星期二）嗰日指出，基本上各個口岸都有相應嘅措施。羅湖海關講，如果有旅客體溫有啲高，可能需要即場做核酸採樣先可以過關，但即使檢測結果係陽性，都唔需要強制睇醫生接受治療，同埋唔需要隔離；而皇崗海關嘅回應都差唔多，又指呢個抽檢政策一直都喺度存在。

有網民表示：「仲以為睇緊早兩年新聞，都2024仲玩依啲on9嘢」、「以為回帶」，亦有網民：「我想scan番安心出行」、「強烈呼籲香港跟進，係機場、各大口岸大規模抽查！！！」。《I》